日常

很少更新了，將來應該會更少更新。純粹記一下。

大環境唔係咁好，有幸上年升職無受影響，但身邊職場處境真是天與地，有專業人士繼續薪高糧準無憂，也有少部份朋友開工不足同待業中。以前年輕時我無見過朋友同學搵唔到野做，人到中年翻身機會唔多，年輕的朋友若無父幹我建議還是盡快開始學習理財和人生規劃，不要把錢只花在消費上。

近況

上年年尾升左職忙左，家中有成員因健康問題要照顧，加上此BLOG沒有什麼有啟發的內容可分享，所以懶下懶下不更新一個月, 兩個月, 半年直到現在。最近工作上新職務已熟習，家中事情也告一段落，終於有時間又再寫下。

股市最低跌穿22000，可幸沒有使用槓桿，賬面上最差時損失了接近6位數字。股票只佔我資產很小部分所以未至於瞓唔著，但有一事極需反省，自己主要持股一直是405同823，當初1052因新冠肺炎預期未來業績會受到甚大影響而股價大插，我卻因為看405股價沒有跟隨跌，大安主義以為佢會獨善其身，沒有在跌市初期沽出，結果可想而知受到了多大教訓，後期因為跌太多太急所以放棄沽出。

不過無論股災輸贏，最重要疫情之下大家平平安安，少聚集勤洗手戴口罩，忍耐一下不要外遊，幫助自己幫助其他人，有健康的身體財富才更有意義。

近況

一排沒有更新，因為公私都很忙，不過反正個Blog都係用黎記錄沒什麼所謂啦。

近況方面，無現金支付都流行左一段時間，但我無用開淘寶等等, 係呢方面真係out到冇朋友。最近終於的起心肝約埋朋友上大陸，試下網紅食肆之餘, 順便測試下使用Wechat Pay香港錢包在內地支付是否可行。咦，又真係得喎! 我冇大陸電話也沒有大陸銀行戶口都用到，不過要記得買張數據卡上網，大陸商場同食肆d wifi 好渣，上唔到網個錢包有幾多錢都冇用。預先係香港便利店入定錢或者link香港銀行戶口都ok，埋單時會自動兌港元過數，以後唔駛唱定錢返大陸又唔駛怕再收到梅菜咁既1元五毫紙幣。內地好多野都越來越方便，係大陸置業是否可行? 下一步都係開返個大陸戶口同大陸電話。

閒聊

近十年財務自由成為了流行語, 是一眾未上岸的人士的終極夢想, 尤其是剛出社會的年輕人, 恨不得有父幹20歲立即就有幾棟樓收租不用工作成為人生贏家. 到底什麼時候財務自由不用工作成了人生輸贏的標準? 對我來說追求財務自由目的是為了多個選擇權, 有能力的話我想工作到正常退休但不想因為錢的關係去選擇自己的職業, 例如我想賣魚蛋, 如果財務自由了就不用因為賣魚蛋人工低, 有大有細要養而去找份朝九晩六的寫字樓工, 或者可選擇返半日工, 多些時間與家人相處.

另外就是為老後生活做準備, 年老最大問題就係唔多唔少都有D病痛, 科技進步, 到時大家考慮的不再是有得醫或是無得醫, 而是治療費用和治療後的護理對家庭的負擔, 唔好以為七老八十先會有大病, 上個月陪親人出入醫院見唔少青年人中左大病. 靠兒女? 不說久病床前無孝子, 香港多數三四人家庭, 若又要返工賺錢又要照顧家中病人和大小事務, 真係心理同生理上都好大壓力. 靠政府? 政府雖然有資助但如果唔想排咁耐去私家或者想吃效果較好既藥都係要自己比錢. 早些購買適合的保險令自己有事時減少麻煩他人, 有多條路選擇. 如果已有病保險公司要加大額LOADING先受你玩或者根本唔受你玩, 更應該儘早運用資本做好資產配置, 建立被動收入為將來打算.

耐心等待是有用的, 前提是你有無播好種, 冇播種子等幾耐都係一無所獲.

第一次收取債劵利息

當初想學人買債, 但又唔夠錢做PI, 銀行既債劵銀碼又太大, 入場費最少要100000美金, 評分好少少既200000美金, 不太適合我呢種債劵新手. 於是走左去開個IB戶口, 貪佢有銀碼細D的債劵買賣(最低2000美金), 最緊要有得試下.

一開始其實非常不習慣, 因為它沒有香港的債劵, 等於我要在一堆不熟識的美國公司債劵作出選擇, 原本想用桿杆的想法一下子就消失了, 決定先穩打穩紮的學習基本流程. 把港元換成美金, 然後用搜索找出目標, 評分BA3或以上, 年期為3年內, 息率5-7%, 半年派息, 價格在100附近. 最後用2000美金在價格100買入了GNW的一條短債, 利息6.515, 2018年5月到期. 你問有沒有更好的deal? 當然是有, 但只是2000美金, 唔想花太多精神了.

等左半年, 今日終於第一次收取利息, 65美金左右, 有種學習有了成果的感覺. 前陣子見唔少blogger話有債劵的價格急跌, 呢隻雖然無跌不過評級就跌到B2, 價格由106-96都試過,  希望維持到100票面價, 出年5月再收多一次息功成身退.

人生隨想

最近有2位長輩離去, 一時牽扯起人生到底為什麼的思考.

兩位長輩, 一位是我親戚. 居於內地本業務農. 適逢內地經濟起飛成功轉型做建築公司, 是他那輩親戚中最成功及最受人尊重的, 可惜是兒女都不成才未能把他的事業承繼下來. 另一位是舊居的鄰居, 人很有文化, 對我家很照顧. 不同於屋邨師奶們的八卦和粗鄙, 她一家都有種書香門第的氣質, 兒女讀書都很好, 我曾經羨慕過生在那樣的家庭真好. 兩位都是令人尊敬的人, 聽到他們離開的消息, 有點悲傷, 一來是他們年齡只是65左右, 二來是想起久遠相處時的點滴回憶.

但時間一久, 除了懷念, 還剩下了什麼? 親人/兒女/朋友/同事還是繼續過日子, 每刻都有新的生命來到世上, 世界沒有因為少了一個人而停止運轉.  無論你覺得自己多重要或其他人覺得你多重要.

我才驚覺人的一生最需要為自己負責, 太在乎其他人的眼光而活得抑壓或放棄自己的理想, 而那些人他媽的會懷念你嗎? 甚至都不知道你是誰. 人生說長不短, 今天起努力做自己想做的事, 不要拖, 希望將來老去離開的一刻我不後悔活過.

(偽)財務課程

話說在網上出名的財經分享BLOGGER有不少都會搞返D財務分享課程比D網友, 美其名開心SHARE,  幫你上岸, 收費由幾百蚊到幾千蚊都有. 無錢又想發達既你總會掙扎"其實係咪真有用?" "值唔值得比咁多錢去上堂呢?"

年少無知時我都有去聽過一次免費買樓Talk, 邊個搞就唔開名, 總之一個月都有幾次呢d talk. 課室是一個meeting room,  容納到40-50人, 不包講者工作人員, 其中有10個左右的出席者是互相認識, 開始後幾個blog主輪流講下自己咸魚翻身d威水史, 由無錢到有錢之類. 好啦, 開心share完, 演講者就開始叫大家比錢去上佢地d進階班, 收費幾千蚊 , early bird平幾百. 講比D明白人聽, 明就明, 唔明就唔明, 有錢齊齊搵.

我當刻都有D衝動想報名, 發達喎邊個唔想, 但銀碼對當時既我還是有點大, 當想了解多d進階班既資料時, 他們就表示是更多的note, 但買樓要知道既資料網上能找到一大堆, 連手續程序全部都寫得好詳細, 他們進階班的notes還能教會我什麼? 他們說會有睇樓團, 有分享會, 但睇樓我一向都有睇看, 唔明一堆人去睇樓仲要返黎報告既意義.

最後我意會到這個所謂課程費用, 最主要的目的是用來買一個networking---他們相熟的經紀找到既荀盤, 他們認識的法律從業員的一點免費諮詢, 可能仲可以一班人集資投資買樓買工廈齊齊搵錢. 我開始衡量這個networking對我的幫助值不值得付出幾千蚊的金錢. 最後我無參加呢個course, 因為他們找到的荀盤我不夠首期買, 要集資也遠不夠金錢. 所謂既好處對我一d用都無.

當然我唔參加唔代表個course無用, 坐我旁邊的少婦聽完說即刻參加課程了, 還和我說她就是blogger說的蠢人, 賣左自住樓租樓到宜家. (所以在哪裡跌倒要在哪裡爬起身, 誓要再買樓致富嗎?)  如果當日有10個人報名, 唔知呢10個人會唔會有人發左達, 但blogger們袋袋平安了幾萬蚊, 一個月幾次, 相信都搵到10萬以上, 一年下來都夠做多個單位既首期, 又多d吹水既資本.

財經課程太多混水摸魚之輩, 他們會講好多發達的例子比你聽, 但把最重要的成功之道藏得很深.  作為財商bb班既你要分辨對方是授人以魚還是授人以漁.  純開心share既100-200蚊一個talk ok, 當比錢買一本書睇. 幾千蚊既要謹慎考慮一下對方的真意和教程內容, 比錢買networking強烈不推薦, 因為有用的人脈是建基在你對對方也有用處時, 只有你搵人著數的人脈不會長久.