日常

很少更新了，將來應該會更少更新。純粹記一下。

大環境唔係咁好，有幸上年升職無受影響，但身邊職場處境真是天與地，有專業人士繼續薪高糧準無憂，也有少部份朋友開工不足同待業中。以前年輕時我無見過朋友同學搵唔到野做，人到中年翻身機會唔多，年輕的朋友若無父幹我建議還是盡快開始學習理財和人生規劃，不要把錢只花在消費上。

近況

上年年尾升左職忙左，家中有成員因健康問題要照顧，加上此BLOG沒有什麼有啟發的內容可分享，所以懶下懶下不更新一個月, 兩個月, 半年直到現在。最近工作上新職務已熟習，家中事情也告一段落，終於有時間又再寫下。

股市最低跌穿22000，可幸沒有使用槓桿，賬面上最差時損失了接近6位數字。股票只佔我資產很小部分所以未至於瞓唔著，但有一事極需反省，自己主要持股一直是405同823，當初1052因新冠肺炎預期未來業績會受到甚大影響而股價大插，我卻因為看405股價沒有跟隨跌，大安主義以為佢會獨善其身，沒有在跌市初期沽出，結果可想而知受到了多大教訓，後期因為跌太多太急所以放棄沽出。

不過無論股災輸贏，最重要疫情之下大家平平安安，少聚集勤洗手戴口罩，忍耐一下不要外遊，幫助自己幫助其他人，有健康的身體財富才更有意義。

近況

一排沒有更新，因為公私都很忙，不過反正個Blog都係用黎記錄沒什麼所謂啦。

近況方面，無現金支付都流行左一段時間，但我無用開淘寶等等, 係呢方面真係out到冇朋友。最近終於的起心肝約埋朋友上大陸，試下網紅食肆之餘, 順便測試下使用Wechat Pay香港錢包在內地支付是否可行。咦，又真係得喎! 我冇大陸電話也沒有大陸銀行戶口都用到，不過要記得買張數據卡上網，大陸商場同食肆d wifi 好渣，上唔到網個錢包有幾多錢都冇用。預先係香港便利店入定錢或者link香港銀行戶口都ok，埋單時會自動兌港元過數，以後唔駛唱定錢返大陸又唔駛怕再收到梅菜咁既1元五毫紙幣。內地好多野都越來越方便，係大陸置業是否可行? 下一步都係開返個大陸戶口同大陸電話。

跌市

市場中人講左咁耐股市會跌, 終於跌市真係黎啦.

呢幾日過往一年的股王700, 2382, 2018, 175等相繼倒下, 跌市的恐怖在於一瞬間就能把股民套牢, 即是你聞到燶味都趕唔切逃生. 例如舜宇一日跌20%以上, 近半年入既邊個走得切.  唔會話升唔返既, 不過就唔知幾時.

呢幾個月因為睇返自己之前寫的文章, 一直說服唔到覺得300已經貴既自己去撈回軟至360既騰訊, 心水既股票又沒有特別跳水平賣, 如是者從買入平安後就暫停了買賣, 現在回看剛好少做少錯.  市場是不是便宜我覺還不算是, 如果手頭已有貨而且入貨價有充足既安全邊際的話, 我會選擇不減持而且等待一下有沒有便宜的好貨可買. 如果是三線炒股的話, 我會選擇減持, 因為在熊市它的價格只會每天更低而且翻身無力.

閒聊

近十年財務自由成為了流行語, 是一眾未上岸的人士的終極夢想, 尤其是剛出社會的年輕人, 恨不得有父幹20歲立即就有幾棟樓收租不用工作成為人生贏家. 到底什麼時候財務自由不用工作成了人生輸贏的標準? 對我來說追求財務自由目的是為了多個選擇權, 有能力的話我想工作到正常退休但不想因為錢的關係去選擇自己的職業, 例如我想賣魚蛋, 如果財務自由了就不用因為賣魚蛋人工低, 有大有細要養而去找份朝九晩六的寫字樓工, 或者可選擇返半日工, 多些時間與家人相處.

另外就是為老後生活做準備, 年老最大問題就係唔多唔少都有D病痛, 科技進步, 到時大家考慮的不再是有得醫或是無得醫, 而是治療費用和治療後的護理對家庭的負擔, 唔好以為七老八十先會有大病, 上個月陪親人出入醫院見唔少青年人中左大病. 靠兒女? 不說久病床前無孝子, 香港多數三四人家庭, 若又要返工賺錢又要照顧家中病人和大小事務, 真係心理同生理上都好大壓力. 靠政府? 政府雖然有資助但如果唔想排咁耐去私家或者想吃效果較好既藥都係要自己比錢. 早些購買適合的保險令自己有事時減少麻煩他人, 有多條路選擇. 如果已有病保險公司要加大額LOADING先受你玩或者根本唔受你玩, 更應該儘早運用資本做好資產配置, 建立被動收入為將來打算.

耐心等待是有用的, 前提是你有無播好種, 冇播種子等幾耐都係一無所獲.

第一次收取債劵利息

當初想學人買債, 但又唔夠錢做PI, 銀行既債劵銀碼又太大, 入場費最少要100000美金, 評分好少少既200000美金, 不太適合我呢種債劵新手. 於是走左去開個IB戶口, 貪佢有銀碼細D的債劵買賣(最低2000美金), 最緊要有得試下.

一開始其實非常不習慣, 因為它沒有香港的債劵, 等於我要在一堆不熟識的美國公司債劵作出選擇, 原本想用桿杆的想法一下子就消失了, 決定先穩打穩紮的學習基本流程. 把港元換成美金, 然後用搜索找出目標, 評分BA3或以上, 年期為3年內, 息率5-7%, 半年派息, 價格在100附近. 最後用2000美金在價格100買入了GNW的一條短債, 利息6.515, 2018年5月到期. 你問有沒有更好的deal? 當然是有, 但只是2000美金, 唔想花太多精神了.

等左半年, 今日終於第一次收取利息, 65美金左右, 有種學習有了成果的感覺. 前陣子見唔少blogger話有債劵的價格急跌, 呢隻雖然無跌不過評級就跌到B2, 價格由106-96都試過,  希望維持到100票面價, 出年5月再收多一次息功成身退.

轉按成功

今個月終於搞掂轉按H+1.5%, 1%回贈仲有額外的朋友介紹回贈, 計埋慳左頭一年利息, 供款少左而且按到返少少錢出黎. 會先將筆錢放入Mortgage Link再定期買入REIT.

呢D錢借貸利率只是H+1.5%, 大約1.8-1.9%, 真係稅貸都無咁抵. 再用黎買返收6-7%息既股票賺息差.  因為本金係自己努力賺返黎, 寧願穩穩陣陣賺少d, 有餘比多d錢母親大人花費,  都唔想炒股轟轟烈烈蝕左佢,

呢個方法會持續實踐, 並密切觀察經濟環境的變化.